մեծանուն կոմպոզիտոր Տիգրան Մանսուրյանն իր պատանեկության տարիների մի հատվածն ապրել է Արթիկ քաղաքում: 1947 թվականին Մանսուրյանների ընտանիքը Բեյրութից ներգաղթելով Հայաստան, բնակություն է հաստատել Շիրակ աշխարհի Արթիկ քաղաքում: Հաճախել է մեր քաղաքի միջնակարգ և երաժշտական դպրոցները՝ վաղ հասակից դրսևորելով իր փայլուն ընդունակությունները: Հետագայում մայրաքաղաքում խորացնելով իր կրթությունն ու գիտելիքները, իր նվիրումի, տաղանդի ու աշխատասիրության շնորհիվ հասնում է փայլուն արդյունքների, դառնալով բազմաթիվ երաժշտական ստեղծագործությունների հեղինակ: Դրանք են՝ նվագախմբային, կամերային, երգչախմբային և վոկալ գործեր, որոնք կատարվել են ամբողջ աշխարում և համալրել են հայ երաժշտական արվեստի ոսկե ֆոնդը: Նրա ստեղծագործությունը համաեվրոպական երաժշտական նվաճումների և ազգային երաժշտական մշակույթի լավագույն ավանդույթների միաձուլման համոզիչ օրինակ է:
Հաշվի առնելով մաեստրո Տիգրան Մանսուրյանի վաստակը հայ և համաշխարհային երաժշտական արվեստում, ինչպես նաև այն հանգամանքը, որ նրա օրինակելի և հագեցած կյանքի պատանեկան շրջանն անցել է Արթիկում, Արթիկ համայնքի ավագանու 2014 թվականի հոկտեմբերի 24-ի որոշմամբ Արթիկի մշակույթի կենտրոն համայնքային ոչ առևտրային կազմակերպությունն անվանակոչվել է նրա անունով:
Իր բեղմնավոր ստեղծագործական գործունեության ընթացքում մաեստրո Տիգրան Մանսուրյանը մշտապես պահպանել է կապը Շիրակ աշխարհի, Արթիկի և արթիկցիների հետ, իր բազմաթիվ և բազմաբնույթ հանդիպումների, ելույթների ժամանակ սիրով և մեծ ոգևորությամբ է արտահայտվել Արթիկում անցկացրած տարիների, իր վառ տպավորությունների և հուշերի մասին, որոնք հետագայում դարձել են ստեղծագործական ներշնչանքի հզոր աղբյուր: Արթիկյան պատկերներն արտահայտվել են նրա հարուստ ստեղծագործությունների մեջ:
Ղեկավարվելով Տեղական ինքնակառավարման մասին ՀՀ օրենքի 18-րդ հոդվածի 1-ին մասի 26-րդ կետով և հաշվի առնելով նրա ծառայություններն Արթիկ համայնքի և նրա ազգաբնակչության նկատմամբ, Հայաստանի Հանրապետության Շիրակի մարզի Արթիկ համայնքի ավագանին
Որոշում է՝
Տիգրան Եղիայի Մանսուրյանին շնորհել Արթիկ քաղաքային համայնքի պատվավոր քաղաքացու կոչում: